Monday, September 15, 2014

سرائیکی میڈیم سی ایس ایس

ہمسایہ ملک بھارت وچ علاقائی زباناں میراٹھی، گجراتی، تامل،تیلگو، کشمیری، اردو، ہندی، سندھی تے پنجابی وغیرہ مقابلے دے امتحان سی ایس ایس وچ لازمی مضمون ہن تے ذریعہ امتحان وی ہن۔ سندھ وچ محکمہ مال دا ریکارڈ تے تھاݨے دی ایف آئی آر سندھی زبان وچ ہوندی ہے۔ جہڑا جج وکیل افسر سندھی نی ڄاݨدا او فائل خاک پڑھسی؟ تے فیصلہ خاک کریسی؟ ایں سانگے پاکستان وچ سی ایس ایس وچ سندھی لازمی ہووݨ ٻہوں ضروری ہے۔ سرائیکی پاکستان دی ہک وݙی زبان ہے، پاکستان دے چالہی فیصد لوک سرائیکی ہن۔ پاکستان دے سی ایس ایس وچ سندھی، پشتو تے سرائیکی کوں لازمی آپشنل کیتا ونڄے۔ تے باقی پرچیاں وچ سندھی، پشتو تے سرائیکی کوں ذریعہ امتحان بݨایا ونڄے۔ 
 سندھ دے سکولاں کالجاں وچ سندھی لازمی ہے۔ سرائیکی علاقے دے سکولاں کالجاں وچ سرائیکی لازمی کیتی ونڄے۔
سندھ دے پی سی ایس وچ پنجابی، پشتو، بلوچی تے سندھی دا آپشنل لازمی مضمون تے پرچہ ݙیڈھ سو نمبراں دا ہے پیا، سرائیکی شامل کائنی۔ بلوچستان وچ سو نمبر دا بلوچی، بروہی، پنجابی، سندھی تے پشتو دا لازمی آپشنل پرچہ ہے، سرائیکی شامل کائنی۔ سارے صوبیاں دے پی سی ایس وچ سرائیکی شامل کیتی ونڄے۔
پنجاب وچ دیپال پور، تاندلیانوالا، پنڈی بھٹیاں، پھالیہ، ملکوال، چکوال ، جنڈ تے بلوچستان وچ دَرُگ، بارخان، صحبت پور، جعفرآباد، نصیرآباد، جھل مگسی تے سندھ وچ کشمور، جیکب آباد تے گھوٹکی وچ مقامی تے لوکل زبان سرائیکی ہے۔ پنجاب، بلوچستان تے سندھ دے سکولاں کالجاں وچ وی سرائیکی لازمی کیتی ونڄے۔



Sunday, September 14, 2014

اردو ہندی دی حقیقت

اردو تے ہندی ہکو زبان ہے۔ اردو یا ہندی بھارت تے پاکستان دے کہیں وی علاقے دی مقامی زبان کائنی۔ بھارت دی ریاست یوپی وچ ست زباناں ٻولیاں ویندیاں ہن، کھڑی ٻولی، برج بھاشا، قنوجی، اودھی، بھوج پوری ، بندیلی تے باگھیلی۔ کھڑی ٻولی سہارن پور، مظفرنگر، بجنور، میرٹھ، بھاگ پٹ، رام پور ، جوتیباپھول نگر تے غازی آباد دے ضلعیاں وچ ہے، ہیں کھڑی ٻولی دا ٻیا ناں اردو یا ہندی ہے، باقی زباناں برج، قنوجی ،اودھی،بھوجپوری، بندیلی تے باگھیلی اردو تے ہندی کنوں ٻہوں مختلف تے وکھریاں زباناں ہن۔ دلی وچ ہریانوی تے کھڑی ٻولی ہے، لکھنؤ وچ اودھی زبان ہے۔ ہریانہ وچ ہریانوی تے راجھستان وچ راجھستانی زبان ہے۔ علی گڑھ تے آگرہ وچ برج بھاشا ہے.
دلی وچ کھڑی تے ہریانوی زبان ہے۔ دلی کنوں علی گڑھ دا پندھ 138 کلومیٹر ہے۔ علی گڑھ دی زبان برج بھاشا ہے۔ علی گڑھ کنوں قنوج 214 کلومیٹر تے زبان قنوجی ہے۔ قنوج کنوں لکھنؤ 125 کلومیٹر دور ہے تے لکھنؤ دی زبان اودھی ہے۔ دلی کنوں لکھنؤ دا کل پندھ 500 کلومیٹر ہے۔
ہریانوی دے پنج  لہجے ہن: باگڑی،بانگڑو،دیسوالی، میواتی تے ہریانوی۔
برج بھاشا دے ست لہجے ہن،اودھی دے اٹھ لہجے ہن۔
کھڑی بولی دے پنج لہجے ہن: وجیگا، سپیرا، دیہاتی، ہندوستانی تے کھڑی بولی۔ ہیں چھیکڑی لہجے کھڑی بولی دا ݙوجھا ناں ہندی ہے۔ تے اردو ہیں ہندی دا ݙوجھا روپ ہے۔ 

Tuesday, September 9, 2014

قوم تے ملک


سوال: قومی ترانے وچ ہے " قوم ملک سلطنت" قوم تے ملک وچ کیا فرق ہے؟

جواب: 
ہک ایہو جیہے علاقے وچ وسݨ آلے جیندی زبان تے ثقافت ہکا ہووے، او لوک ہک قوم ہوندے ہن۔ انتظامی بنیاداں تے حکومت چلاوݨ کیتے علاقیاں دی ونڈ ہک ملک ہوندے۔ ہک ملک چھـوٹا وی تھی سگدے، تے ٻہـوں وݙا وی تھی سـگدے، مـلک تے قـوم وچ فـرق ہونـدے.پنجـابی ہـک قوم ہے۔ ایہہ ݙو مــلکاں وچ وسدے ہن۔ عربی ہک قوم ہے. عربی قوم دے درجناں ملک ہن. پاکـستان ہک ملک ہے. پاکـستان وچ پنـج قـوماں ہن. سـرائیکی ہک قوم ہے. سـرائیکی زیـادہ تر ملک پاکستان وچ وســدے ہن۔ سلطنت سلطان کنوں ہے۔ ہک سلطنت وچ پہلے کئی کئی مُلک ہوندے ہَن۔ اجکل زیادہ تر ہک ملک ہے۔


Monday, September 8, 2014

سرائیکی

پاکستان وچ سرائیکی 40فیصد، پنجابی 18 فیصد، پشتو 15 فیصد، سندھی 12 فیصد، اردو 7 فیصد، بلوچی 3 فیصد، باقی زباناں 5 فیصد ہن۔